الإضافة الجديدة والنقلة

صباحكم عافية:

خاتي في بالي أنه يوم الخميس دا آخر أيام الأسبوع والجمعة فيها برنامج مزحوم من مراسيل و شغل لنظافة بيت ل.. ل.. وأنا ما بأفسر وعارفك ما بتقصر ،،عشان كدا ما داير أزحمك كتير كبسولة صغيرة تختم بيها الأسبوع وإكان إكان لقيت فرقة جمعة وسبت راجع الفات من فتح الدعوى الى بداية التحرى وإجراءات المتحرى وخطواته الى التقرير بتوجيه التهمة ويكون كيف الى شطب البلاغ ثم شطب الدعوى، الإضافة هسي شنو أقوى بيناتك كإتهام شهادة الشهود والقرائن والاستدلالات الأخرى وإلا شهادة المتهم ضد نفسه يعنى شنو شهادته ضد نفسه ؟ يعنى يديك المفاتيح كلها ويسلمك نفسه تماما خاضعا لحكم المحكمة كتحرى تسمعة وتقفل عليه وإلا تحتاط لأنه ممكن يغير كلامه ويشتت ليك الورق؟ إكان خفت من دي تكرب كلامه ليك بشنوووووو؟ من بدري بدري تلحقه القاضي يسجل ليك كلامه  القاله ليك دا عشان يأكده قدام القاضي وليه القاضي وبيسجل الكلام دا كمحكمة؟ طيب ما يحاكمه ويخلص ممكن قانونا ؟؟؟دا الحنشوفه طيب انت كوكيل نيابة لقيت دا كله قدامك والقاضي سجل ليك كلام المتهم ناقصك شنو؟؟ وحتمل بعد كدا شنو . انت كممثل للمتهم وإلا ممثل للشاكي إتوجهت التهمة أو ما اتوجهت شطبت الدعوى وإلا ما شطبت حتعمل شنو فى دورك. دى كبسولة آخر الأسبوع وقدامك جمعة سبت وعلييك ياالله:

الكلام عن الإعتراف القضائي بيفتح ليك المادة 60 ما نحن عبرنا من 55 الى 56 و57 و58 و59 مش؟ ودي ذاتها جيناها من 33 الى 48 شفت قطعنا مشوار قدر شنو؟؟ طيب عشان ندخل على المادة 60 لازم تكون متذكر عندك 17مصطلح فى المادة 5 إجراءات جنائية لازم تكون هاضمها كويس جدا زيها زي المادة 3 من القانون الجنائي 1991 لأنها مفتاح الشعل كله.. رقم 12 من المادة 5 دي (حترتبها انت المشرع ما رقمها رقمها عشان تعرفها بالرقم) عرفت القاضي:بأنه أي قاض فى محكمة جنائية مختصة (خلى بالك محكمة جنائية مختصة لازم لازم وإلا لا سلطة وحيث لا سلطة لا اختصاص وحيث لا اختصاص فالعدم (قرار بلا اختصاص معدوم الأثر.) دى واضحة تمام تمام نمشي . وديت المتهم لقاضي محكمة جنائية مختصة تسلمه المتهم والورق وتمشي ليه تمشي عشان المتهم ياخد حريته ويتكلم مع القاضي بصراحة وممكن طبعا يشتكيك للقاضي يا مولانا ماسكنى من يدى البتوجعنى ما بقدر أقول غير الكلام القال لي قوله تفتكر القاضي حيسجل كلامه ويمشي فى موجتك؟؟ أكيد لا لازم مولانا يتأكد أنه المتهم دا بكامل حريته حيقول الحقيقة ويلزم نفسه بالمسئؤلية الجنائية وعارف عاقبتهاعشان كدا قلت ليك المتهم شهد ضد نفسه يعنى ممكن المحكمة تدينه بس باعترافه القضائي كدى لي قدام بنشوف تفاصيل أوفي على لغة الإعلاميين ديييك.

طيب قاضي ومختص وتحقق من أن المتهم يدلي وأدلى فعلا بأقواله بكل حريته وإرادته الحرة وشهد ليك ضد نفسه، القاضي لازم يكتب الكلام دا المتهم قدامى وتأكدت أنه لا إكراه مورس عليه و لا ضغط وطواعية وبإرادته الحرة قال…..) خلى بالك مولانا بالحرف ما بصياغتك انت الحلوة المنمقة الإنشائية السمحة لا بحرفية كلامه عشان مصداقية كلامه وعشان لما المحكمة تقرأ ليه إعترافه ويلقى ألفاظه ذاتها يتأكد أنه ماف كلام مدسوس نص كلامه ويطمئن للمحكمة وللعدالة ويصدق مع نفسه والآخرين ، معلش مولانا مفروض انك عارف أنا عارف لكن من باب درش المعلمين أقبلها ما تحمر لي كدا…ههه. ببساطة كدا ودردشة دي المادة 60 بدون خمة نفس (الفقرة الأولى حددت للمتحري يعمل شنو لو المتهم  أقر بارتكاب الجريمة والقاضي واجب عليه يعمل شنو الفقرة الثانية  بس حكاية توقيع المتهم على إقراره دي جديدة مش ؟ بس داير المشرع يأكد أنه الكلام دا المتهم ما ناكره لو رفض التوقيع عليه معناها ما موافق على المكتوب مولانا حيكتب أنه رفض يوقع ويوقع هو ذاته عشان دا كله منسوب ليه هو ما غيره وهمسة صغيرة كدا عليكم الله قضاة الجنايات أكتبوا الإسم والدرجة والمحكمة المختصة في دائرتها ما تشخبط بتوقيعك الما معروف وبس  (بعدين حأقول ليك ليه ..)

طيب وكيل النيابة ناقصك شنو عندك التقارير الطبية والمعملية(المعمل الجنائي )الطب العدلي ..الخ والمتهم اعترف قضائيا خلاص المتحري أداك ملخص البينات ولخص البلاغ زي ما قعد يقولوا حتحول البلاغ للمحاكمة بكامل تحرياته عشان تمشي القضية للمرحلة التانية ، طيب محامى المتهم كنت عايز البلاغ يتشطب زما اتشطب وبقى دعوى وتقرر توجيه الاتهام وتم حجز والا قول جددت النيابة ويمكن القاضي كمان الحبس الاحتياطى عندك فرصة تعمل شنو؟ أرجع أفتح المادة 21 الفقرة الثانية منها عرفت حتستأنف شنو لمنو؟؟؟ ووكيل النيابة عرف شنو من قراراته يحتاج تأييد ومن منو..؟؟ بس أسمع أسمع هنا حتة خطيييرة الفقرة تلاتة قالت القرار النهائي لوكالة النيابة ما لوكيل النيابة ما ساكت عندها مدلول فنى لو راجعت المادة 5 /15و 16 و17 حتعرف مش اتفقنا ترقمها وشفت المادة 17 نفسها من القانون نفسه قالت شنو عن مكون النيابة العامة؟؟ يبقي كدا تفهم شنو يعنى القرار النهائي لوكالة النيابة يعنى تضمن رؤية كامل هيكل النيابة العامة مش بس وكالة النيابة لا بنتكلم عن النيابة الجنائية الأصيل .عشان تفهم 21 الفقرة التالتة دي ولازم تنتبه الاختصاص فى نظر الاستئناف لقاضي الاستئناف وليس لمحكمة الاستئناف شوف السوابق الشارحة فى الكتاب ولكم التحايا:يلا كفاية كدا الى لقاء آخر على رأي مولانا الشعراوي رحمة الله عليه :

سلام الله عليكم أجمعين:

معلش ظروف عملية بحتة اقتضت الغياب ، قلت ليكم من أول بحاول بقدر المستطاع أوفق بين العمل الرسمي والتطوعي واقتطع من متاح الوقت لأرفدكم بما يتيسر فمعذرة على الغياب والانقطاع .

معلش نواصل : نحن مواصلين  فى إجراءات الدعوى الجنائية وبدينا التحرى وسمعنا شهود وسجلنا اعتراف المتهم القضائي واستأنفنا قرار وكيل النيابة لوكيل النيابة الأول (الرئيس المباشر وشفنا قرار كامل هيكل النيابة العامة  فيما تعلق بحجز الأموال وشفنا أنه  يستأنف لقاضي الاستئناف مش محكمة الاستئناف. مفترض طبعا أنه اتجاوزنا اليوم الأول من حراسة المتهم باعتبار أنه دي جريمة قتل وإلا نسيتوا الوقائع المطروحة والتلاتة أيام بتاعة النيابة العامة ممثلة فى وكيل النيابة العامة، ودا بيخلينا ندخل فى حكاية الحراسة وتجديد إيقاف المتهم ونشوف منو سلطته شنو؟ أفتح 79 وعنوانها الحبس للتحري لشنو؟ للتحرى .. الفقرة الألى تعلقت بسلطة الشرطة فى توقيف المتهم لأربع وعشرين ساعة ووجوبا يعرض على وكيل النيابة بعدها وقبل ما تنقضى الساعات الأربع وعشرين وإلا حيكون الضابط المسؤل مواجهة بحجز غير مشروع ، يبقى سقف الشرطة أربع وعشرين ساعة طيب ما انتهى التحرى وما حينتهي طبعا الجريمة كبيرة هنا يجوز تجديد حبس المتهم لما لا يتجاوز ثلاثة أيام بقرار من وكيل النيابة (صاحب الاختصاص) طيب كملت التلاتة أيام والتحري لس هنا وكيل النيابة يعمل تقرير لقاضي الجنايات المختص برضه يشرح فيه ما تم وقيام بينة تبرر استمرار التحرى فى مواجهة المتهم ، ويجوز لقاضي الجنايات يأمر بتمديد حبس المتهم للتحرى لأسبوع ويمدده لأسبوع آخر يعنى سلطته أسبوعين فقط لا أكثر ولأنه دا قرار متعلق بحرية زول ومجرد متهم يعنى قد لا تنجح الشرطة فى بينات تكفي للمحاكمة ويتفك ويتشطب البلاغ ضده عشان كدا لازم قاضي الجنايات يوضح الأسباب لللتجديد للمتهم ، طيب خلصوا الأسبوعين والتحرى ما خلص  هنا لازم يكون التحرى قطع شوط كويس ووصل لبينات تكفي لتوجيه التهمة ودي مهمة جدا جدا انتبه لأن التجديد مشروط بأن يكون المتهم واجه التهمة يعنى النيابة العامة قررت توجيه التهمة للمتهم يعنى البينة تقلت شوية وحتى الآن المتهم مورط فى دم القتيل . فى الحالة دى القاضي الأعلى منو ؟؟ القاضي الأعلى يعنى المشرع يتطلب خبرة أعلى تتوفر لقاضي لمتابعة تجديد الحراسة الحكاية طولت وأكثر من أسبوعين المتهم فى الحراسة متابع؟؟ يعنى القاضي جدد الحراسة لأسبوعين ومتابع التحرى كل أسبوع جدد الأسبوع الأول وجدد الأسبوع التاني وانتهت وما انتهى التحرى ، هنا القاضي الأعلى بيجدد حبس المتهم كل أسبوعين مش كل أسبوع زى القاضي الجدد ليه أسبوعين ، طيب سلطة القاضي الأعلى كم حدها الأقصى ستة أشهر يعنى سلطة أعلى تدرجنا من 24 ساعة لثلاثة أيام لأسبوع بحد أعلي أسبوعين وتجديد القاضى الأول كل أسبوعين بسقف ستة أشهر ماشيى . التحرى ماشي ونتذكر طبعا دى قضية رقبة اتوجهت النهمة وماشين فى التحرى يعنى ضاقت الدائرة على المتهم .طبعا المشرع قدر أنه دى فترة كافية جدا ينتهى فيها التحرى ويتحول الورق للمحكمة برضه خاتي إحتمال أنه القضية متشعبة ومعقدة وما ينتهى التحرى ووكيل النيابة مستمر فى تقاريره عن سير التحرى ويقتنع القاضي الأعلى ويجدد للمتهم كل أسبوعين وصلت الحكاية ستة أشهر هنا لازم ينتقل الإختصاص لرئيس الجهاز القضائي لأنة المسألة مش بس فنيات تحرى فيها كمان متابعة إدارية ما تنسى أنه رئيس الجهاز القضائي مسئول عن العمل القضائي فى ولايته قدام رئيس القضاء ولازم يكون عنده مبررات كافية لإستمرار حبس المتهم لأكثر من ستة أشهر عشان كدا وصل المشرع الاختصاص لرئيس الجهاز القضائي على مستوى الولاية. طيب دا الحبس للتحرى وحكاية الحبس للمحاكمة معناها خلاص النيابة رفعت إيدها وسلمت القضية للمحكمة ودى قضية رقبة والمتهم منتظر المحاكمة مش استكمال التحرى واضحة دي؟ برضه القاضي يجدد الحبس للمحاكمة كل أسبوع لما لا يزيد عن أسبوعين والقاضي الأعلى لما لا يتجاوز ستة أشهر وينتقل برضه الآختصاص لرئيس الجهاز القضائي . واضح طبعا أهمية المادتين 79 و80 وإهتام المشرع بشرعية ومشروعية بقاء المتهم رهن الحبس للتحرى والمحاكمة . ركز في دي  عشان نجى المرة الجاية نشوف حكاية إطلاق سراح المتهم بالضمان وخليك فاهم أنه ليس كل ضمان ضمانة لكن كل ضمانة ضمان يعنى شنو ؟؟ نشوف سوى فى لقاء قادم بحول الله.

 

السلام عليكم ورحمة تعالى وبركاته:

عرفت أنه تأجلت امتحانات التنافس على شهادة تنظيم المهنة ورغم التوتر وشد الأعصاب ولسان حال بعضكم يقول كنا قلنا وقوع البلاء و لا انتظاره ، وإلا كنا عايزين نخلص بأية حال لكن خلونا نقول قدرنا الله وما شاء فعل وأمر المؤمن كله خير ، وساعة أبرك من ساعة وكل تأخيرة وفيها خيرها وعسي أن تكرهوا شيئا وهو  خير لكم وعسي أن تحبوا شيئا وهو شر لكم ونقول جميعا اللهم دبرنا فإنا لا نحسن التدبير ، وأمرنا كله لك وبيديك.

كنت ألمحت ليك المرة الفاتت عن الضمان والضمانة وشنو يعنى ضمان وصحى كل ضمانة ضمان لكن ما كل ضمان ضمانة عشان أكمل ليك الحتة دى ولعلمك ولي دنياك وزمانك ولأغراض التنافس هي من أخطر مناطق العمليات بلغة ناس الجيش ، ودا بحكم أنى وعلى مدى 12 أو 13 سنة كممتحن ومصحح لشهادة تنظيم مهنة القانون ،عارف يعنى شنو مناطق عمليات وعارف نحن كلنا كممتحنين قعد نفكر كيف ونختار نجيب الامتحان من وين وما سر ما ببساطة دا إسمه شهادة تنظيم مهنة القانون يعنى اختبار لمقدرتك على فهم النص وتطبيقه يعنى الامتحان عملى ما نظرى وقع ليييك؟؟

بالفهم دا ركز معاي ،، المتهم دا الشرطة وصلته وعندها عليه بينة وصلت لمستوى توجيه الاتهام يعنى قريب من الإدانة والعقوبة جاي انت كمحاميه وإلا أخوه وإلا هاميك أمره تقول لي مش إنت يا وكيل النيابة وباعتبارك ممثل المجتمع عايز تاخد حق المجتمع وتقدمه لمحاكمة أنا بجيبه ليك وقت ما إنت عايزه وأجزم وتحت مسئوليتى لا يشرد لا يغيب حأسألك كوكيل نيابة تضمن لي دا ؟ انت حتقول أيوا أديك الضمان الإنت دايره يعنى إنت حتقدم ضمان يضمن لوكيل النيابة تنفيذ الزامك بإحضار المتهم متى طلب منك، دا الضمان الحتقدمه للنيابة العامة وتقبله منك وتفك ليك الزول على مسئوليتك وتحت إلتزامك بالضمان القدمته وقبلنته منك. كويس كدا ؟؟ طيب الضمان دا مكن يكون مبلع مالى كشرط تلتزم انت بيه إذا ما جبت المتهم تدفعه وما كلام ساااكت كدا لا دا حيتنفذ عليك بيه كأنه غرامة أفتح 115 من قانون الإجراءات الجنائية مش كدا وبس ممكن توديك السجن أقرأ النص تاني 115 دا ذاته  شفت كيف الكلام جد ما مجرد ونسة وفكة مجلس؟؟

طيب إذا وضحت ليك الفكرة أفتح 105 إجراءات جنائية وشوف حالات الضمان…. الضمان لاحظت؟؟شفت الضمان ممكن يكون شنو ؟؟؟؟ (أ) التعهد يعنى التعهد ضمان ؟ طبعا  وممكن يكون معاه ضمانة مالية يعنى مبلغ تحدده النيابة،دا معناه الضمانة مقصود بيها المبلغ المالي المحدد كشرط فى حالة عدم الوفاء بالضمان يعنى إذا الزول غفلك وشرد وإلا غاب من جلسة حتدفع المبلغ دا وممكن يوديك السجن إذا ما دفعت. يعنى التعهد ضمان والضمانة ضمان يعنى تكفل الضامن بإحضار المتهم وإلتزامه بالمبلغ المحدد برضه ضمان ، طيب ممكن المتهم نفسه يودع خزانة المحكمة وإلا النيابة مبلغ يساوى قيمة المال محل الاتهام ما نقول الجريمة عشان نتحسب لدقة اللفظ وبنشرحها إن شاء الله لقدام لما نتكلم عن القانون الجنائي، أها شفت الضمان ممكن يكون شنو وشنو وشنو؟؟ دا كله يضمن شنو يضمن حضور المتهم الى أن تنتهي الإجراءات ضده واضحة مش؟؟

كفاية عليك كدا ركزفى دا وعيد مرة واتنين وتلاتة قراية المواد عشان تتأكد أنها وقعت ليك وما حتنساها تاني .

نلتقى إن شاء الله ونشوف الأحكام التفصيلية للضمان منو يضمن بشنو ؟؟

عن الكاتب


اضف تعليق

لن يتم نشر عنوان بريدك الإلكتروني. الحقول المطلوبة تتميز بـ *


يمكنك استخدام HTML وسوم واكواد : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

error: عفوا